فرعونيات - مآساة ملك عظيم : وا حكا رع
من موقع علم المصريات - Sherif Sarky
علشان مانفهمش غلط
اللي لسة بيفكر بعقدة الخواجة ومتصور ان الأجانب أعلى مننا في القدرات على الفكر والبحث والدراسة له عندي هدية صغيرة تخليك تفكر 1000 مرة قبل ما تاخد منهم معلومة بدون التحقق التام من مصادرها الأصلية.
أنا حاليا عامل معسكر وبادرس شخصية غامضة وفي نفس الوقت في منتهى الخطورة في تاريخ كيمة. الملك واحكارع أو باكن رعنف. الملك التاني في الأسرة 24. الملك ده ممكن يدرس كمادة لوحده في الجامعات رغم إنه حكم 5 سنوات بس ومات محروق أو مسلوخ على يد الملك الكوشي شاباكا سنة 720 تقريبا ق.م.
الغريب إن الملك ده مالوش أي صورة أو تمثال معروفين رغم إنه مشهور جدا في أوربا لان له صور جدارية (تخيلية) في إيطاليا وفازات مكتشفة وآثار كتير ومقبرة بإسمه ورغم إنه واحد من أهم 6 مشرعين في تاريخ بلدنا كله (في رأيي هوة أهمهم كلهم). كان بيشار إليه بلقب الحكيم وقصص عدله وحكمته كتير جدا ومنها حالات مشهورة نسبت لناس تانيين. قوانينه بتدرس في كليات الحقوق في العالم كله. وفيه عالم آثار روماني إسمه أكيم بوبيسكو قضى حياته كلها في دراسة الملك ده.
المهم ماخبيش عليكم .. فرحت جدا لما لقيت صورة لتمثال له وكمان المقبرة بتاعته. لكني باحب دايما التحقق من كل حاجة ..قلبت النت لقيت الثتمثال والمقبرة دول مش بتوعه !!!!
طلعت الحقيقة إنهم بتوع وزير في عهد الملك بسماتيك الأول من الأسرة 26 بيحمل نفس الإسم.
المذهل إني مريت على عشرات المواقع الأجنبية (اللي مفروض إنها محترمة زي ويكيبيديا وغيرها) .. ولقيت موضوع التمثال والمقبرة دول منتشرين جدا في كل مقال عن الملك ده بدون الإشارة إلى إنهم مش بتوعه !!!
المذهل كمان إن الدنيا كلها عارفة إن الصورة اللي وجدوها في بيت الطبيب في بومبي لقاضي بيحكم هيا بتاعته لان أحبابنا الجريج قاموا بمهمة الترويج للملك ده في كل أوربا لدرجة إنه بقى علامة للعدل هناك والرسوم المرتبطة بيه على الجدران الأثرية بكثرة في إيطاليا بالذات .. ورغم كدة تلاقي واحد طالع من كام سنة يقول إن القاضي في الصورة هوة سيدنا سليمان !!!
أنا باحكي الموضوع ده علشان دايما نرجع للمصدر الأصلي ومش كل حاجة يقولها الأجانب تبقى صح .. أحيانا بيعملوا حاجات هبلة برضه.
تعليقات
إرسال تعليق