وبعدين يا كورونا ؟؟ نروح فين ونيجي منين ؟

وبعدين يا كورونا ؟؟ نروح فين ؟ ونيجي  منين ؟

كتب : صلاح الدين محسن
20-4-2020

الناس محتارين و موش عارفين يعملوا أيه
مافيش غير اننا نقعد في البيوت عشان المرض لا ينتشر.
وبعد ما نقعد في البيوت ؟
الحكومة تدينا فلوس
وَ اذا الحكومة ما تقدرش تدي شعب كامل ، قاعد في البيوت ، نعمل أيه ؟
نضغط علي رجال الاعمال والأغنياء ولاد ستين x سبعين  ، علشان يدفعوا مرتبات الناس ومرتبات كاملة كمان
ماشي حيدفعوا .. وتوجد حكومات دول غنية مثل كندا تكفلت وارسلت بالفعل لكل واحد علي حسابه في البنك مباشرة ، ووعدت لمدة ٤ شهور  ، ونقعد في البيت
طيب ... معنا الفلوس وقعدنا في البيت
وبعدين .. ؟ كل ما تظهر حالات كورونا في مكان نقفله علشان العدوي لا تنتقل
طيب
لمدة كأم من الوقت ؟
دي تساهيل ، يمكن تتوقف علي دخول الصيف بعد ٤ او ٣ شهور
بس ؟ أكيد؟ 
ممكن تطول لحد ما يكتشفوا عقار مضاد لاكورونا ، بعد سنة أو سنتين  بالكثير
بسيطة المهم ان الحكومات ورجال الأعمال والمصانع دفعوا فلوس للجميع وكلنا قعدنا بالبيوت
بتوع الكهرباء  ظهرت عندهم إصابات ، قعدوا في البيوت .. الكهرباء قطعت عشان ما حدش بيشغلها
وبتوع مرفق المياه نفس الشيء ، وقعدوا بالبيوت ، وعشان مرتباتهم مضمونة ، قعدوا بالبيوت زينا وعشان إصابة اكتشفوها بين العاملين
يبقي مافيش مياه حتوصلنا للبيوت
المهم ان معانا فلوس  الحكومة ورجال الأعمال دفعوها لنا ، وقالوا حندفع ولو لأخر دولار نمتلكه حندفع
كتر خيرهم بس حنشرب منين ؟ والكهربا المقطوعة حنعمل أيه ؟
نستخدم شموع لحد أسبوع وتحصل أزمة في الشموع ، ومصانع الشموع قعدوا في البيت
نستحمل الظلام
طيب ومزارع الدواجن وقفت  ... ومزارع الخضار والفاكهة العمال وقفوا  وقعدوا في البيوت  
ومصانع الصابون ظهرت فيها اصابات كورونا وقفلوا وقعدوا بالبيوت  
المهم ان معنا الفلوس وبتوصل لنا لحساباتها في البنوك وتمام
حنشتري بها أيه ؟؟ هو فيه حاجة نشتريها ... معنا فلوس .. حناكل فلوس ؟ حنشرب فلوس ؟ ننور بيوتنا بالفلوس؟ حننظف ملابسنا وبيوتنا بالفلوس ؟
والمستشفيات قفلت عشان الأطباء والممرضات قعدوا في البيوت بسبب وصول الكورونا لهم ، والصيادلة كمان ، وعيادات الأطباء الخاصة ،. ومصانع الأدوية كمان

بس معانا الفلوس ووصلت أكيد وما حدش مقصر في حقنا ، لا حكومة ولا أثرياء. ولا رجال أعمال خدنا الفلوس من عينيهم ..
 لكن حنشتري ايه بالفلوس , اذا كل حاجة مافيش لأن مافيش انتاج لأن الكل قاعد في البيوت ؟؟
حنعمل بها أيه بالفلوس !؟ 
وحنتعالج بايه ؟ هي الأمراض كورونا بس ؟ 
 الامراض كتيرة قبل الكوليرا وبعد كورونا ، طيب مين حيعالجنا ؟ ومين حيصنع لنا الأدوية ؟ ومين حيخزنها عنده نشتريها منه وقت ما نحتاجها ( الصيدليات ، يعني )  .. اذا كان كلهم قفلوا وما فيها انتاج ، ولا أطباء شغالين ولا صيادلة .. يبقي حنعمل أيه بالفلوس اللي معانا لو حد جاله مرض وإلا احتاج دواء ، حنروح فين ولمين بالفلوس اللي معانا ؟
يوجد ناس لا ينظروا للأمام .. عشان يشوفوا العواقب حتكون أيه ؟
وحكومات فكرها ان الناس يقعدوا كلهم في البيوت وخلاص ! بدون ما ينظروا لقدام ، ويسألوا نفسهم : الي متي ؟ ولا : أيه النتيجة لو كل الناس قعدوا في البيوت ؟
لو لمدة شهر وبس وأكيد .. تبقي سهلة .. لكن .. 
وناس لا يفهموا يعني أيه ان الانتاج لازم يستمر ... فكرهم ان دا كلام اصحاب الأعمال ، وبس وأنهم لا يهمهم الا مصالحهم ، وكأن الانتاج هو انتاج لرجال الأعمال بس .. صحيح هم اللي بيكسبوا بالكوم ، لكن لو توقف الانتاج حتكون المصيبة علي دماغ عموم الناس قبل رجال الأعمال .. لو توقف انتاج السلع والخدمات ..  عموم الناس ومحدود الدخل حيتعبوا جداً . حيموتوا في البيوت . 

لو توقف مصنع أو مزرعة أومعمل أو مرفق خدمات لمدة 4 شهور .. هي إعادة التشغيل سهلة !؟ بس تضغط علي زر وكله تمام !!؟؟

طيب نترك البيوت ونخرج للشغل ونموت ؟
وان تركت الانتاج وقعدت في البيت حتموت من الجوع لا حتلاقي أكل ولا مياه ولا كهرباء ولا صابونه تغسل بها وتنظف بيتك وتنظف نفسك ..

وأبسط شيء : البقاء في البيوت وممنوع الخروج لمدة ليست أجازة أسبوعية ,, لا .. ممكن شهر وبعد شهر ولا نعرف الي متي ؟ نتيجتها ايه يا أخصائيي النفس والأعصاب والاجتماع .. ؟

والحل ؟
نواصل العمل مع أخذ كل الاحتياطات للسلامة .. كمامة , غسل الأيادي , ترك مسافة
كافية بين كل شخص وآخر .. وباقي ما يوصَي به .
معركة .. حرب . أسوأ أنواع الحروب . حرب مع عدو لا نراه .. !
واللي له نصيب في الحياة سوف ينجو . ومن له نصيب في الموت , هو شهيد وراح دفاعاً عن حق باقي الناس في أن يعيشوا ويجدوا لوازم العيش من أكل وشرب وكهرباء ودواء وعلاج ومواصلات واتصالات وخدمات ..

ولعل الواجب في مثل هذه الظروف ,, الاستعانة بطلاب وطالبات السنوات النهائية بكليات الطب , في العمل بالمستشفيات . في حالة وجود ضغط شديد علي الأطباء .. للمساعدة وأخذ خبرة عملية . 
=========