أول ملكة في التاريخ

منقول من الفيسبوك . يوم 12-4-2020  من موقع :

Mohamed Mohie Khattab

#تأملات

#أول_ملكة_فى_التاريخ

لوحة حجرية عادية تبان جدا ممكن تعدى من جنبها فى المتحف المصرى بدون حتى ما تلفت نظرك ، ولكن كعادة كل الاثار المصرية فى وراها قصة ريادة وتفوق مصرى ..

ده شاهد قبر من ام الجعاب فى ابيدوس محافظة سوهاج ، مكتوب عليه "مر نيت" ومعناه محبوب(ة) نيت ،

 ونيت / نيث ، هى ملكة مصرية علماء الاثار صنفوها كأول امرأة تحكم فى العالم القديم وهى ترجع لعصر الاسرة الاولى المصرية وغالبا هى بنت الملك جر زوجة الملك جت وأم الملك دن، ملكة بنت ملك زوجة ملك أم ملك ، فضل الاعتقاد بأنها اول ملكة حاكمة فى التاريخ كله لحد ما ظهرت اكتشافات اثرية فى حلوان وابيدوس ونقادة وحتى فى سينا بتذكر اسم ملكة اقدم منها وهى "نيت حتب" ، ملكة مصرية تانية حكمت فى بداية الاسرة الأولى قبل "مر نيت" !!!

الريادة المصرية وصلت لان يكون عندنا اول ملكة مسجلة فى التاريخ لمصر ولما الكشوفات الاثرية تعدل المعلومة فنلاقى الملكة الأقدم منها مصرية برضو !!

وطبعا الاسماء دى بتتنسى امام الشو الاعلامى الغربى الى مركز على كليوباترا او الاتجاه الشرقى اللى بيلبسوه ثوب دينى فيكلمونا عن ملكة مجهولة بيسموها بلقيس ، وتبقى الاسماء دى هى الاشهر بالاونطة اما الرواد الاوائل بجد فولا كلمة !!

فاضل بس نقول ان "نيت/نيث" هى ربة الحروب فى مصر القديمة وكان ليها اهمية قصوى فى عصور الدولة القديمة لان كان فى طقس مهم بتحل فيه روح او كيان نيت نفسها بداخل الزوجة الملكية (ملكة مصر) وتبقى هى تجسيد نيت على الارض، وكذلك شهرة نيت وسيطرتها فى العصور المبكرة خلت اسماء كتير مرتبطة بيها.

وفى اول كومنت تمثال لنيت ربة الحروب والصيد فى مصر القديمة ولينك الشير لو حد حابب يشير البوست

احنا كمت

#عاشت_كمت

====================