عجائب فرعونية
#معلومة_كمتية الحلقة 8
... النهاردة هكلمك عن حاجة مش بس استثنائية، ولا بس متفردة. دية حاجة من رقتها تخليك تبتسم ومن حكمتها وفلسفتها تخليك تسند ايدك الشمال على خدك وتفكر ازاي كده!
هناك داخل قدس اقداس المعبد، كان يجلس عازف الهارب/الموسيقي لتُصاحب موسيقاه ميلاد رع في هيئته كحور. بمعنى ميلاد الشمس في الأفق الشرقي بسماء الجنوب. بعد رحلة طويله بياخدها رع خلال ساعات الليل، بيمر فيها بأوقات عصيبة، طاقته فيها بتقل جدا بسبب الرحلة. قلبه بيتعب ، ويصيبه الكدر.
ففي رمزيه كونيه لتجديد قواى رع ، لم يجد المصري إلا الموسيقى علشان تجدد روحه وتشيل عنه الكدر ويلاقي حاجة حلوة علشانها يتولد من تاني ومن جديد على ارض مصر.
خليني اشرحلك بعمق اكتر يا صديقي لو تحب.
الموسيقى ارتبطت بالماعت، ماعت بنت رع فهي القانون وهي الهارموني الكوني.
"ماعت سا رع" او ماعت بنت رع كانت كينونة غير متجسدة لانها متعالية. وده من أحد أسباب ان رع لما بيسيب العالم النجمي الليلي في هيئته كاتوم او صورته كاله متعالي، ويبتدي رحلته النهارية متجسد ومتفاعل مع ارض مصر. كانت ماعت متقدرش تتجسد وتصاحبه، فيفتقدها رع في رحلة النهار.
(تخيل معايا إحساس اب مسافر بعيد عن بنته حبيبته ممكن يتكدر كل يوم اد ايه وفي كل ساعة يفقد ابتسامته و يترسم بدلها زهد في أي فرح )
فكان الحل ان ماعت او الهارموني تتجسد في الموسيقى. الحل ان ماعت تمر من خلال قوانين الاوتار لغاية ما توصل لوجه رع فيبتسم.
فالموسيقى بالنسبة للمصري القديم سر من اسرار الكون الفسيح وقوانينه.
باختصار، الموسيقى في مصر القديمة هي قوانين لبعث الهارمونى الكونى. انها تجلى خفي لماعت،وفي نفس الوقت تجلي صريح لقدرتها على تجديد الكون والهام رع الابتسامة والرضا والطيبة. فكان العازف بيقول لرع بعد عزف الموسيقى لتكن طيبا وخيرا على كل ارباب الأفق.
معلومة النهاردة يا صديقي:
"سما" بالمصرية القديمة يعني يعزف الموسيقى.
نهارك سعيد ومليان بالخيرات والهنا، ويجعل ايامك كلها بلا كدر. وما تنساش تفتكرني بكلمة حلوة لو وصلك مني أي معلومة او فكرة او الهام.
-----------------
الصورة المرفقة لجدارية الموسيقي دجد خنسو اون اف عنخ – عنخ و هو بيعزف القيثارة للإله رع حور اختي مبتهلا لرع ان يرضى وبعزفه يكون بيمحو عن رع الكدر ويجعله مسالما مع ارباب الأفق.
---------------------------------------------
"حقوق الملكية الفكرية محفوظة، أي تعدي يُعرض للمساءلة القانونية بموجب القانون المدني وكود الحقوق الفكرية"
ايري دحروج
Lyre de Mercure – Editions
KMT – Ancient Egypt -تاريخ مصر القديم
تعليقات
إرسال تعليق