عن الاسكندرية
:
عن الاسكندرية
Mon, Oct 16, 2017
مساء - صباح الخير. للصديق العزيز
الناس ممكن يفكروا إسكندرية اكل وشرب بس ،،، ولو انها فعلا متميزة تماما في المعيشة ككل ، وأسعارها أرخص من القاهرة ومن اَي محافظة أخري ،، لكن لا ننسي ان إسكندرية أيضا :
قلعة قايتباي - لازم نزورها
وإسكندرية هي المتحف اليوناني الروماني - لازم نزوره
وإسكندرية هي : المسرح الأثري الروماني العجيب ،،، قرب محطة الرمل ،، ولازم نزوره
وإسكندرية فيها بيت الموسيقار الخالد فنان الشعب. سيد درويش ،، في حي " كوم الدكة " لازم نزوره
وإسكندرية أيضا : مكتبة الاسكندرية الجديدة التي أحيوا بها مكتبة الاسكندرية التاريخية القديمة ، وشاركت في ذلك دول العالم
وتحياتي إليك وتمنياتي لك بالصحة والسعادة
كان هذا تعقيبي علي رسالة الصديق , التي كان نصها :
On Oct 15, 2017
اسكندريه سر كبير ميعرفهوش غير الاسكندرانيه
اسكندريه يعني الدنيا ترخ على دماغكـ وانت ولا في دماغكـ
اسكندريه يعني ريحه اليود في عز الشتا تعدل مزاجكـ
والبحر عمال يطش في الصخور قدامكـ
جربت تبدأ يومكـ بسندوتشين فول وفلافل من عند محمد احمد او جاد في محطه الرمل او سندوتش جبنه تركي و بيض بالبسطرمه من عند البان سويسرا
جربت تتمشى في محطه الرمل والدنيا بترخ وانت ماشي مستمتع وهي بترخ على راسكـ
جربت تروح تتغدى عند عبده فرج في المنشيه او عند زفير في الماكس او قدوره في بحري او حتى شعبان في المنشيه احلى اكله سمكـ
جربت فته الكوارع من عند الصفتي او الفسيخ من عند سلطان الفسيخ بتاع العطارين
جربت احلى هريسه بالقشده من عند الحلبي تحلي بقكـ
جربت بيتزا شيجابي في محطه الرمل وحته جاتوه عند بسترودس
جربت تقعد على قهوه والي في كامب شيزار او قهوه انح في بحري وتشرب شاي في الخمسينه بالنعناع طيب بلاش خليها واحد حلبه حصى
كل ده والدنيا عماله ترخ على دماغكـ وانت ولا في دماغكـ
جربت تشرب كاكاو ساقع في عز البرد من البن البرازيلي في محطه الرمل
جربت شويه كسكسي بالمكسرات واللبن من عند الشيخ وفيق ........ورز بلبن بالجيلاتي من عند صابر او عند عزه ومكرم والي يجي في بالكـ
جربت شويه سوداني مملح من عند مفيد ولب اسمر من طرطوسيه الي في محطه الرمل وانت بتتمشى مع صحابكـ
جربت لما تحب تتعشى انت وصحابكـ تطلع تاكل كبده اسكندراني وحلويات وقلوب وسدق من عند صالح فتوح او وهبه وتحبس بالعصير من عند طلعت الي قدامكـ
او تروح تشرب احلى خروب او عصيرقصب من عند الحلبي او عصير مكه انت واحبابكـ
يومكـ مش حيخلص لو انت صاحي ومش جايلكـ نوم لان اسكندريه للصيح صاحيالكـ
اطلع على المعموره اجر عجل ولف المعموره كلها وهي برده بترخ على راسكـ
جربت تكون هموم الدنيا كلها فوق راسكـ وتقعد على صخور البحر ساعه تنسيك كل همومكـ
جربت كوبري ستانلي في عز الشتا وام كلثوم بتغني في كاسيت عربيه الترمس ومش لاقي مكان تستخبى من الشتا وانت بتاكل الترمس او كوز الدره بيندهلكـ
رحت جامع ابراهيم او المرسي ابوالعباس صليت فيهم ركعتين تناجي فيهم ربكـ
لو مجربتش كل ده يبقى مجربتش تعيش عيشه الاسكندرانيه
اسكندريه يعني اسرار كثيره اوي ولانها اسرار حتفضل اسرار الاسكندرانيه ولا تقبل الانتهاكـ
اسكندريه عشق لا ينتهي الا بمنتهاكـ
تعليقات
إرسال تعليق