الحال و باختصار

مختارات : صلاح الدين محسن

5-1-2023

من الفيسبوك زومبجي   Zombagi   مشاركة Emad Azer   ٤-١-٢٠٢٣

مسكونى شركه صغيره .. و حلفت لهم بشرفى أن الشركه دى فى خلال سنتين هتكون من أفضل الشركات..

و من يوم ما مسكتها و أنا مش بنام..

بدأت التطوير من أول لحظه..

شلت البلاط القديم و عملت الأرضيات كلها رخام..شلت التكييفات القديمه و عملت تكييف مركزى..غيرت الديكورات تماما..

بصراحه كنت عاوز أعمل تغيير شاااامل يليق بالشركه..

لكن السيوله اللى فى الشركه خلصت و أنا فى نص مشوار التطوير..

اضطريت أبيع شوية مكن و أستلف من الشركات التانيه..

لكن الموضوع لسه محتاج سيوله عشان مستقبل الشركه..لازم أربط الحزام..

قللت مرتبات العمال و سرحت شوية موظفين..

و طبعا العمال و الموظفين عشان معندهومش انتماء لشركه بدأوا يعملوا مشاكل..و كل ما يخشوا مكتبى و يشوفوا التطويرات اللى تعملت فيه يحقدوا و يطلع السواد اللى جواهم..

لكن أنا صاحب مبدأ..ولى هدف لن أحيد عنه مهما حصل..

اضطريت أرهن الشركه عشان أرصف المداخل و أشجرها و أعمل اضاءات ليليه تليق بشركه محترمه..

البنك اللى رهنت له الشركه طلب منى أوفر عماله و أبيع شوية مكن كمان..

الحقيقه أنا وفرت و بعت..

والحمد لله.. نتيجة التطوير بدأت تبان لكل الناس..

كل اللى رايح و اللى جاى عمال يبص على الشركه..مش مصدقين حجم العمل اللى تم..

معجزه بكل المقاييس..

احنا عملنا معدلات غير مسبوقة فى انجاز أعمال ارخام  و الدهانات و عملنا أرصفه مش موجوده فى أفضل الشركات فى أمريكا و أوروبا..و اللى عملناه فى سنه كان يحتاج سنين..

صحيح أصحاب الشركه اتحبسوا لكن كله يهون..

و بعدين ان شاء الله لما يخلص التطوير اللى فى دماغى همشى عشان انا مش غاوى مناصب..

أنا يهمني التطوير و بس..

و عموما انا مش هسيب الشركه دى غير لما التطوير يخلص لأن دى أمانه فى رقبتى و ربنا هبحاسبنى عليها..

و مش هيهمنى شوية الكلاب اللى عماله تنبح دى طالما القافله تسير والحمدلله..

حد له شوق فى حاجه؟

____________________________