ردح بلدي بين المانجة والعنب

المانجة قالت للعنب    ..   إتلم يا مفرط

مركون ومالك سعر    ..  علي أيه بتتشرط

زعل العنب منها        ..   راح مشتكي للموز

وقاله ينفع كده؟     .. أو حتي يعني يجوز؟

إكمنها زبدية؟       ..     تعمل كده فيا؟

ده أنا كنت في العنقود ..   جميل وليا العجب

بس الزمن دار بيا       .. ودا شئ عليا إنكتب

فأنا حقي لو مجانيش   ..   ها أقلبها قله أدب

وأفضحها ف الأسواق   ..       عديمة الأخلاق 

ده الكل منها داق     ..     والرك ع النيه

مضروبة ف الخلاط       ..    مشروبه بالشفاط

مفيناش صوات وعياط    ..       وسدي يا عنيا

مش عامله فيها كيوت ..مش ماشيه لية مظبوط

عوجه ببوز مخبوط    ..    ده أنا نجم أغنية

أحمر وأصفر فيه       ..   وأخضر كمان تلاقيه

ماتشوفي غيري بقى   ..     وأرمي بلاكي عليه

ده المحشي من ورقي  ..    والخمرة من مرقي

وانتي اما تتفلقي        ..   تتحطي في زكيبة

ده أنا بيتي تكعبية        ..  وعزوتي رهيبة

ورصتي عجيبة  ..   وليا حبيبة

     مش يعني متمرمط

المانجة قالت للعنب. :

سامحني يا مفرط.

#وعجبي....الشاعر سامح هريدى

____________________________