سجين راى
منقول من الفيسبوك . صفحة المحامية ماجدة رشوان يوم 22-4-2024
سجين راى
Magda Rashwan
سجين راى يرجو أمه الموافقة على انهاء حياته بيده
كنت عند عمر بعد ماخلصت اجازة العيد وكان أول يوم يخرج عمر من زنزناته لمدة أسبوع كان خاسس جدا اكتر من كل مره.. سلم علي وقعد منكمش في الكرسي على جنب وماسك ايده في بعضها ومابيتكلمش باصصلي مبتسم وبس قولتله طمني عليك.. الحمدلله.. صحتك أخبارها.. الحمدلله.. عامل ايه مع العلاج.. الحمدلله.. قولتله اتكلم ياعمر وحشني صوتك.. قالي التعب باين عليكي اوي نفسي تقتنعي ان وجودي جنب بابا ارحم لي وليكي انا عايش في قبر عند حاكم ظالم وبابا في قبر عند حاكم عادل تفتكري مين فينا احسن من التاني اقتنعي إن وجودي عنده افضل وتبقى زياره واحده منك لينا إحنا الاثنين وتوفري جهد وتعب ومواصلات انا سمعت إنها غليت.. قولتله ياحبيبي انت شاغل بالك ليه بالغلاء خليك في نفسك انت قالي هو ممكن اشغل بالي بايه.. أنتي بتمشي برجع زنزانتي اقعد على الفرشه بتاعتي في الأرض اكل الأكل اللي جيباه معاكي اخلص واصلي وانام واصحى في نفس المكان على الأرض مابعملش حاجه غير اني استناكي الزياره الجايه عشان أخرج من زنزانتي والاقي حد أكلمه بدأت انسي الكلام بقيت اتوتر لو شوفت حد وانا خارج بدأت انسي أشكال ناس كتير من العيله ومن صاحبي كنت الأول بقعد أكتب جوابات لكل الناس رغم اني عارف ان الجوابات مش هتخرج بس كنت برتاح كنت بحس اني اتكلمت معاهم فعلا بس منعو الورقه والقلم فمش بعرف اكتب ولا بكتب مزكراتي زي الأول كانت بتريحني.. كنت برسم عشان مانساش الرسم الهندسي رغم رعشة أيدي المستمره بس كنت بحاول وبستمتع بالتلوين في الرسومات اللي كنتي بتجيبها بس ده برضو منعوه.. كنت لما باجي أنام اقعد اتخيل لما أخرج واقابل الناس اللي بحبهم لقتني بترعب دلوقتي من التخيل ده غير إني مابقتش بعرف اتخيل أصلا بدأت انسي ان في شكل حد تاني غيركم وسجاني من اول مااتحرمت اني أزور وسط الناس.. نسيت شكل الزرع والطيور والحيوانات بقعد كتير افتكر كان شكلهم ايه.. صدقيني يا ماما انا عايش م ي ت وده إحساس مش هقدر اوصفه ولا حد يقدر يتخيله اقتنعي اني اروح لبابا عشان ارتاح انا اللي مانعني انتي لو عايزه تريحني ارضى وسبيني اعمل كده عشان ارتاح وصدقيني انتي كمان هترتاحي واخواتي يعيشوا حياتهم بدل ماهما محبوسين معايا.. يا ماما انا خلاص انتهيت ومفصول من الجامعه والشغل وشبابي راح ومامعيش اي حاجه عشان اقدر ابدأ حياتي من جديد ده في حالة لو خرجت ده غير الأمراض الكتير اللي عندي محتاج اد ايه عشان اتعالج منها كفايه عشر سنين كتير اوي يا ماما فكري في كلامي بعقل والمره الجايه تعالي وانتي مقتنعه مش عاوزه اعمل حاجه وانتي مش راضيه عنها.. طبعا ماكانش عندي اي رد لأن الزياره خلصت ولساني اتربط وقلبي لحد دلوقتي موجوع اوي.
يارب ليس لها من دونك كاشفه.
تعليقات
إرسال تعليق