نقد للقصص التاريخية لنجيب محفوظ
إعداد : صلاح الدين محسن
من الفيسبوك يوم 15-10-2015
صفحة : حراس الحضارة
سندريلا بتاعت نجيب محفوظ
نجيب محفوظ, كتب 6 روايات عن أحداث وقعت في مصر القديمة, بعضها واقعي, ومعظمها إبداع أدبي ملوش علاقة بالواقع الحقيقي لكل قصة.
الروايات الستة, منهم 4 روايات كتبها فـ التلاتينات والأربعينات, ودي فترة كان فيها إزدهار للهوية المصرية, بدأت من ثورة 1919, وإكتشاف مقبرة توت عنخ آمون 1922, أما ساعتها غنت منيرة المهدية:
ميجبش زيي إن لف الكون, دا إحنا أبونا توت عنخ آمووون!
المهم, فـ الجو ده, كتب نجيب محفوظ رواياته عن مصر القديمة, بإعتبارها موضة زمنه, بدأ بيها حياته الأدبية, ومنها دخل علا إبداعاته التانية فـ أدب الحارات وغيرها.
محفوظ عنده أخطاء تاريخية كتير, فـ أسامي الشخصيات والبلاد والأرباب, وسياحته بعشوائية بين مراحل التاريخ المصري, بعضها ممكن يكون من اللي بيسمح بيه الإبداع الأدبي, بإعتبار الرواية ملك للي كاتبها, وإنها مش كتاب تاريخ!
لااااكن, فيها أخطاء صعب نعتبرها إبداع أدبي, لأنها بتشوش وتغير حقايق التاريخ!
التلاتينات –زي ما سبق- كانت مليانة حماس للثقافة المصرية, وفيها إكتشافات لمقابر وبرديات, وتحليلات كتبها الإيجيبتوليست الأجانب, إنما حركة الترجمة كانت لسة ضعيفة, ومفاهيم الإيجيبتولوجي عند المصريين, حتا المثقفين, كانت بسيطة, ومليانة غلطات إتجاوزها علم المصريات, وظهرت المفاهيم الغلط دي, حتا عند واحد من أهم كتاب علم المصريات, وهو العظيم سليم حسن, يعني أديني بحاول ألاقي له مخرج, وإن اللي كتبه إتأثر بمفاهيم التلاتينات!
نرجع لعم نجيب, نلاقي إن اللي عمله فـ "مصر القديمة" و"كفاح طيبة" و"عبث الأقدار", كله كوم, والكارثة اللي عملها فـ "رادوبيس" كوم تاني خالص!
عمل إيه؟
خد تيمة درامية لواحدة من أجمل حواديت مصر القديمة, وحطها فـ رواية!
التيمة الدرامية اللي إستخدمها صاحب نوبل الشهير, هي جزمة سندريلا الشهيرة!
طب, المشكلة فين؟ والكارثة (أو الكوارث) اللي عملها عمنا, إيييه؟
1. ساب القصة الحقيقية, اللي لها بردية من الأسرة السادسة, وهي عن بنوتة جميلة, النسر بيخطف فردة جزمتها وبيرميها علا حجر الأمير, وهو قاعد فـ جنينة قصره, وبتنتهي البردية بإن الأمير بيوصل لصاحبة فردة الجزمة, وأمه بتتعرف عليها, لأنها بنت أختها اللي هربت عشان تتجوز واحد من عامة الشعب, وبكده البنوتة بترجع لقصر جدها, بجوازها من الأمير.
2. نجيب محفوظ الظاهر معجبتوش قصة البردية الأصلية, أو حب يقدمها بشكل تاني, ومختلف خالص, عن (غانية) أرملة جميلة, بتعمل فـ بيتها حاجة زي نايت كلوب, تغني وترقص وترفه عن زوارها القادة والتجار, وفـ آخر السهرة تعمل مسابقة تختار منهم اللي يبات معاها, وبعد شوية بتحصل حكاية الجزمة, وتقابل الملك, ويتحول جلالته لعلاقة غرامية تنسيه الشعب والعرش والملكة والمملكة, لـ حد ما هاجت الناس وطلعت تشتم فـ الملك اللي باع أراضي المعابد وصرفها ع الرجاصة, ويتقتل الملك فـ الهوجة, والأرملة اللعوب تنتحر بالسم!
3. قصة البردية من زمن الأسرة 6, زي ما قلنا, إنما بنلاقي محفوظ بيكتب إسم الرب اليوناني "سوتيس" اللي مصر مسمعتش عنه إلا بعد الأسرة 6, بأكتر من ألفين سنة.
4. أسامي البلاد منضاف لها علامة الإعراب اليوناني (س) زي أمبوس, وده بارضو معرفتوش مصر إلا فـ عصر البطالمة, وكده فـ حاجات كتير.
5. نرجع لقصة محفوظ, نلاقيه إحتفظ بالإسم الأصلي لبطلة حدوتة البردية "رادوبي", إنما صمم علا بطلمة القصة بتاعته, فـ سماها "رادوبيس"!
6. كان ممكن حكاية البطلمة دي تعدي, وأهي رواية أدبية من وحي خيال الكاتب والسلام, لولا إننا بنلاقيه بيحط أسامي حقيقية لشخصيتين من ملوك الأسرة 6, "من-ن-رع", و"نوت-كا-رع", وإن كان ترتيبهم التاريخي خطأ, وشكل الأسامي مختلف, لأنه كتبهم بطريقة قوايم "مانيتون السمنودي"!
7. غير كل ده, خطورة قصة "رادوبيس", إنها مليانة تاريخ, واللي بيقرا لملك الرواية هياخد كلامه ويسلم بيه, زي إن القصة بتحدد سبب إنهيار الأسرة 6, وثورة الشعب, وبداية عصر الإنتقال الأول, حوالي 200 سنة ضياع, بسبب الست الرجاصة!!! ودا طبعا مش حقيقي وملوش علاقة بالإنهيار اللي بدأ من بيبي الثاني, وأسبابه بتعتبر تطور طبيعي للحياة السياسية والإجتماعية فـ مصر القديمة.
8. فيه أخطاء تانية كتير, أنا بس شرحت فكرة الكارثة اللي عملها نجمنا العالي, وإنه مكنش موفق فـ البعد عن القصة الحقيقية, لدرجة خلتني أقول ياريته ما كان إستخدم التيمة الدرامية الغالية دي, لأن أي مقارنة بين اللي هو عمله بقصة رادوبيس (ولا حاجة), وبين اللي عمله كتاب الغرب لما خدو نفس التيمة ومغيروش كتير فـ القصة, إنما عملو منها أشهر حدوتة فـ العالم "سندريلا"!
https://www.facebook.com/Egyptianism.Guards/photos/a.402115239859918/927038094034294/?__cft__[0]=AZWAFkrHcoVrnXrV7StHHmTS549XKAOt0IS9JlhYGc08XwUZ8ooS1XJBZ_oE9fznoIBC1OQ2rckI6rSJWxU4k7xvWkkgGG-7XtF1sb-bTRolojRdsfY3ibkI82aHPxGtQx7DfT5hf_LCsH6nzQH4EIlHnQ_4WKz-F0Np3w_lvpyWybE6yNdotSNhwHFSMEW0PkMvvH654qpwzvpY2iP40YAK&__tn__=EH-y-R
تعليقات
إرسال تعليق